Map bouske lanmou toupatou jis li jou pou kè m, men m pa vle yon lanmou lwen, vwa kase, yon lanmou san nanm, vwa vivi yo kondane nan yon jijman sanzapèl, yon lanmou ki fèt twa jou anvan madichon...
M kou yon jwè bòlèt kap mize yon lajan ke l Konnen l pral pèdi nan yon boul malatchonn. Chak fwa li mize swa li pèdi pou revè, swa tchala bal manti men lap toujou mize paske abitid se vis e chyen ki konn bwè ze ap toujou bwè ze.
M kou wè yon Jenn bray k ap bouske lanmou nan tout rakwen dimonn, fè litani mari ki sen, jete dlo pou rele papa avadra pou elwanye tout lwijanboje ki vle vin pyafe sou lanmou l, louvri pòt kèl, pou l fèmen l ak yon vye kadna wouye ke l triye nan laye kenkay zanmitay.
Map bouske lanmou toupatou jis li jou pou kè m, men m pa vle yon lanmou lwen, vwa kase, yon lanmou san nanm, vwa vivi yo kondane nan yon jijman sanzapèl, yon lanmou ki fèt twa jou anvan madichon, yon lanmou vwa yon fanm ki koumanse konsyan ke tete l koumanse tonbe, nèg li ap gade lòt kote, lòt kò, nèg li ap souri pou kò l, se la tristès pou sila ki lanmoure ki pasa rantre nan souri moun li renmen.
M pa vle yon lanmou tristès k ap trennen, yon lanmou desann matisan lè katouch ap jwe marèl nan sèvèl kèk pasaje, yon lanmou vwa plat, vwa frèt kou nen chyen, yon lanmou vwa anyen pa di m anyen, yon lanmou paspouki , fòs kote, yon lanmou lèd kou move rèv, dyòl mare kou machwè sakristen ki bliye fè jèn karèm.
Yon lanmou kabwèt ak sèso timoun ap woule lè dimanch sou Channmas, yon lanmou ti vwalye papye sik timoun lage nan rigòl dlo sal pou wè sou ki pil fatra yo pral bite, ki lo malpwoprete ki pral rete yo sou kous yo, nan ki ma labou yo pral koule, yon lanmou malatchonn ki ap koupe trip mwen kap fèm pran kaka poul kouve pou ze.
M vle yon lanmou konfyans, yon lanmou touye rache nan tèt yon bon kretyen Kris la gen poul tounen, yon lanmou sèvitè ki kwè te mèt gen gwo tanpèt Agwe va pwoteje l, li p ap mouri neye, yon lanmou ki pa sere tay, yon lanmou san mezire, yon lanmou ki pa apse k ap gonfle k ap tann jou pou l pete, m kwè nan lanmou li dwe triyonfe.
Pa agase lanmou m si w pa prè pou konnen m kou yon pè savann ki konn san senkant sòm yo, pa agase lanmou m pou w pa reveye l paske l pap pran nan dodo titit dodo.
